الورق اللي محتاج تجهزه وانت مسافر - التصديقات

لو انت مواطن مصري  ومسافر  تشتغل بره حتحتاج شوية اجراءات وورق.  انا مش حاقدر اعمل دليل كامل بس ممكن اوضح شوية خطوات في موضوع التوثيق للاوراق اللي حتكون مطلوبة في الدولة التانية

فكرة التوثيق هو ان الهيئات المختلفة في الدول المخلتفة ملهاش تعامل مباشر مع بعض. الموضوع بيكون منسق ومعتمد عن طريق وزارات الخارجية مابين الدولتين. كمثال:

توثيق قسيمة الزواج:.
عندنا في مصر  مصلحة الاحوال المدنية هي المسئولة عن شهادات الميلاد وقسيمة الزواج وغيره. فقسيمة الزواج اللي عندك صادرة منها معترف بيها في مصر... لكن عشان لو في دولة تاني مايعرفوش المصلحة دي.   عشان كده الاعتماد معناه التالي:

1. وزارة الخارجية المصرية بتقول ان ده فعلا ورق وختم مصلحة الاحوال المدنية.. وبالتالي تعترف بيه  
2. وزارة الخارجية بتاعة الدولة التانية (عن طريق القنصلية) بتقول ان ده فعلا ختم وزارة الخارجية المصرية وانا كده موافقة اعتد بالوثيقة دي في الدولة بتاعتي

ممكن يكون في مراحل اكتر على حسب الوثيقة (لو شهادة تخرج مثلا يبقى عندك الختم من الجامعة الاول. وهكذا)


ملحوظة: لو الدولة اللي انت رايحها غير عربية فانت غالبا حتحتاج الشهادات والقسايم وغيره تبقى مترجمة  او صادرة باللغة الانجليزية

ناخد مثال عملي على خطوات وتكلفة توثيق بعض الوثائق بالعناوين من اسكندرية لدولة الإمارات العربية الشقيقة.

الورق اللي ممكن تكون محتاج تعمل له توثيق:

1. شهادة التخرج
2. قسيمة الجواز (لو ناوي تاخد اسرتك)
3. شهادات الميلاد ليك ولأولادك
4. رخصة القيادة الشخصية (حتسهل عليك الحصول على رخصة هناك)

في خطوات مشتركة.. وفيه خطوات خاصة بكل نوع لوحده:  حنخلي الجزء المشترك في الاخر

شهادات التخرج:

1. الكلية بتاعتك . وحتحتاج تعمل اعتماد من الجامعة. بس لازم تقدم الشهادة في الكلية وهما حتولوا الاعتماد من الجامعة وتستلمها بعد كذا يوم (غالبا 3 ايام بس ممكن تاخد اسبوع).
2. توثيق من مكتب وزارة الخارجية اللي في سان ستيفانو
3. توثيق من مكتب الملحق الثقافي الإماراتي في القاهرة. حتسلمها وتستلمها تاني يوم من الساعة 8 صباحا   https://goo.gl/maps/d6FVRXpFjZp
   خطوة الملحق الثقافي انت محتاجها في اي حاجة تخص وزارتي التربية والتعليم والتعليم العالي
4. الاعتماد في مكتب توثيق سفارة الامارات في التجمع الخامس (دفع الرسوم ببطاقة الائتمان فقط.. لايتم التعامل نقدا)    https://goo.gl/maps/DrrfqxWL7vP2

شهادات الميلاد وقسيمة الزواج

1. بالنسبة لشهادات الميلاد والقسيمة روح لمكتب الاحوال المدنية. فيه امضاء اضافية محتاجها من الضابط المسئول هناك قبل ماتوثقها في مكتب الخارجية المصرية
2. مكتب الخارجية المصرية
3. مكتب توثيق سفارة الامارات في التجمع الخامس

رخصة القيادة

لو كنت بتسوق اكتر من 5 سنين ده بيقصر عليك شوية الاجراءات والتكلفة للحصول على رخصة في الامارات. فهات رخصتك معاك.  لكن لو  بتسوق اكتر من 10 سنين .غالبا حتكون جددت الرخصة بتاعتك. فالتاريخ اللي حيكون مكتوب عليها هو من تاريخ التجديد فقط
مثلا:  لو بتسوق من 2005 يعني بقالك 12 سنة...  بس الرخصة بتتجدد كل 10 سنين. لو انت مجدد في معادك التاريخ اللي مكتوب كبداية للرخصة هو 2015.. كانك بتسوق من سنتين بس
لو ده الوضع فانت محتاج تعمل التالي:

1. تروح المرور تطلع شهادة بيانات رخصة قيادة (حيكون مكتوب فيها تاريخ البداية الحقيقي بتاع 2005)
2. تروح مديرية الامن في سموحة تمضيها من هناك
3. مكتب توثيق الخارجية في سان ستيفانو
4. مكتب توثيق سفارة الامارات في التجمع الخامس

الرسمة دي  حتخلي الموضوع اوضح شوية:

ملحوظات مهمة لبعض الاماكن دي:

• جامعة الاسكندرية: 
•  الاعتماد من الجامعة بس التعامل لازم عن طريق شئون الخريجين في الكلية
• فيه دمغة مطلوبة في حدود 25 جنيه تقريبا
• مكتب توثيق وزارة الخارجية في سان ستيفانو  https://goo.gl/maps/4HbudsBL1bJ2
• مكتب الملحق الثقافي في المهندسين
• العنوان ( 96) شارع العلمين متفرع من شارع احمد عرابي، مدينة الطلبة، المهندسين
• https://goo.gl/maps/uH6HgiNzRZ32
• لا يوجد رسوم
• الشهادة تستلم في اليوم التالي مش في نفس اليوم.  ابتداء من الساعة 8 صباحا
• مكتب توثيق سفارة الامارات (القسم القنصلي التابع للسفارة )
• مقره في القطعه 77 شارع التسعين الجنوبي بجوار البنك الاهلي المصري - مركز المدينة - التجمع الخامس
• https://goo.gl/maps/DrrfqxWL7vP2
• روح قبل الساعة 12
• التعامل بالبطاقة الائتمانية فقط (لا يسمح بالكاش)  ولو ماعندكش حيتم توجيهك لبنك قريب تعمل عنده debit card وترجع تاني (مفيش طرق بديلة) 

كل العنواين والتكاليف وحتى الخطوات  طبقا لشهر اكتوبر 2016  وممكن تكون اتغيرت
راجع موقع سفارة الامارات نفسه للتأكيد على كل المتطلبات  http://uae-embassy.ae/Embassies/eg/Content/3144

الطابور

السواقة في مصر من الحاجات المرهقة جدا عصبيا ونفسيا وساعات كتير جسديا... لأسباب كتير.. الزحمة.. الحر.. الدوشة.. الهوا الملوث..  اللي عايز يخش الحمام...  حاجة كلها تنشنة.
بس انا عاوز اتكلم عن نقطة من النقط دي. بتمس الجانب النفسي للي بيسوق. ألا وهي فكرة الطابور.

العربيات بتبقى ماشية في الشارع كأنها في طابور طويل. كل واحد ماشي في مكانه في الطابور. 

لو انت سايق حتبقى ماشي ورا العربيات اللي قدامك بهدوء.  بس لو حد من ورا جه قدامك أو حتى قدام اللي قدامك بتبقى قاعد متضايق ومتكدر. وعايز تعمل اي حاجة عشان تسبقه وترجعه وراك تاني. 

ولو انت ماشي عرفت تسبق حد بتحس بنوع من الانتصار. كأنك اختصرت أو عملت إنجاز. 

فيه قواعد معينة بتحكم الأدوار، يعني لو تاكسي أو ميكروباص أو حتى عربية ملاكي ماشي قدامك وقف ينزل حد على طول من حقك تعديه  وتاخد مكانه.  ورغم أن ده ممكن يكون عبء عليك لو الشارع ضيق شوية بس انت مش بتبقى متضايق. بعكس لو كان الطريق حارة واحدة وانت مش عارف تعديه، دي بتبقى عكننة. 

طبعا مش كل اللي بيسوقوا في مصر كده.، بس أغلبهم. للاسف هي دي روح الشارع. ولو مشيت كده حتى لو مش ده طبعك حتلاقي نفسك واحدة واحدة بتعمل كده وانت مش واخد بالك. 

مش عارف السبب في الظاهرة دي ايه.  يمكن احتياج المواطن لأي احساس بالانتصار حتى لو انتصار زائف أو تافه. 

قواعد التربيه الاربعون

القائمة دي منقولة من صفحة  A.H Training Center  اللي هما برضه ناقلينها من مصدر بس انا ماعرفوش. لكن تستحق المشاركة والاحتفاظ بيها عشان ممكن تخلي كل أب وأم يراجعوا نفسهم مع ولادهم

١) الاطفال بيوسخوا البيت تقبلي الفكره سبيهم يلعبوا و نضفي بليل

٢) المواعين ممكن تستنى لكن ولادك هيكبروا و مش هيستنوكي اقضي معاهم وقت

٣) فكره ان الطفل التخين سليم و الرفيع عيان دي انتهت كفايه نفخ في العيال

٤) ابنك مش ابو تريكه انسوا الكره شويه و علموه رياضه مفيده "هييقى التراس في الاخر و هتلموه من الاقسام"

٥) عزيزي الاب مبروك عندك عيال يا ريت تتفضل معانا

٦) البنت زي الولد ماهيش كماله عدد نظريه اكوي قميص اخوكِ خلصت من الخمسينات "يعتمد على نفسه"

٧) ابنك بيرد عليك عشان اول حاجه اتعلمها تف على عمو يا حبيبي "بديهي"

٨) نظام التعليم فاشل فابنك لو الاول فهو اول الفاشلين بلاش جو المعتقلات في المذكره بالهداوه "

٩) امك مش دكتوره "الا لو معاها كارنيه نقابه الاطباء"

١٠) ولادك احتمال يطلعوا لابوهم الي هو اختيارك اصلاً فبلاش نعايرهم كل شويه انهم زيه

١١) متضيعيش عمرك في خلطه الفراخ السريه الاطفال بتاكل اي حاجه لو كانوا سعداء و بيضحكوا

١٢) المدرسين بياكلوا عيش كلامهم غير موثوق فيه انت بس الي هتعرفي ابنك فاهم و لا لأ

١٣) في اماكن تانيه على الارض غير بيت امك و ‫#‏حماتك‬ يا ريت العيال تشوفها

١٤) المشاعر اهم من الطبيخ و الشغل

١٥) صحيان الصبح متعب لكل انت كمان بتكوني تعبانه فبلاش صويت في العيال هما مش سمعينك اصلاً

١٦) ولادك بيتكلموا و نوعهم انسان يعني عنده مخ و يقدر ياخد قرار اديله فرصته

١٧) الحواديت حاجه مفيده مش هيافه

١٩) الوجبات السريعه مضره و تؤدي الى الامراض "مش شياكه اطلاقاً"

٢٠) المفروض الاستحمام للاسترخاء انما دعك المواعين دا افترى

٢١) صوتك العالي دليل على ضعف موقفك

٢٢) الرسم مش تضيع وقت دا ابداع و الحيطه بتتغسل عادي جداً

٢٣) الهدوم قابله للغسل و اخترعوها عشان تتوسخ

٢٤ ) الهدوم للراحه مش للمنظره

٢٥) ابنك عنده وجهه نظر يا ريت نسأله عن رأيه

٢٦) بلطجه ابنك مش مصدر للفخر اطلاقاً دي مصيبه

٢٧) ابنك مش زي ابن اختك و الهي و مش هيكون زيه

٢٨) ولادك ممكن يصاحبوا ناس غير ولاد اصحابك عادي و يعيشوا

٢٩) اصحاب ولادك مش سبب مشاكلك ،الانحراف استعداد، عالجي ابنك بدل ما نعلق فشالنا على الناس

٣٠) التربيه حوار و الحوار هو انك تتكلم و تسمع مش انك تكر كلام وبس

٣١) الاطفال بيقلدوا الي بيشوفوه مش الي بيسمعوه

٣٢) اتفرج على الكرتون هتتصدم من الي ولادك بيشوفوه اقعد معاهم و وجهم

٣٣) عزيزي الاب تعاطفك لواحدوه مش كفايه

٣٤) الاطفال مش مزعجه الاطفال مكبوته

٣٥) الخطف بقى ظاهره ركزوا مع اولادكم في كل خطوه

٣٦) الفرق بين طفل و التاني اهتمام واستيعاب

٣٧) ابنك مواليد القرن ٢١ و انت من ٢٠ في فرق قرن يا ريت ننسى تربيتك و نتطور بقى

٣٨) بلاش اساطير هعلقك و هطلع عينك خلي تهديدك واقعي

٣٩) النوم للراحه و الاحلام بلاش حفله تعذيب كل ليله ،شويه حواديت و اغاني هتكون اظرف

٤٠) عزيزي الاب منور

نقطة ومن أول السطر

سطر جديد.. صفحة جديدة.. كراسة جديدة...

من مدة طويلة وانا بافكر ابتدي مدونة باللغة العربية... طول عمري باكتب افكار متنوعة باللغة الانجليزية... باحس ان التعبير بيها اسهل بالنسبة لي.  يمكن مسألة تعود. رغم اني مش خريج مدرسة لغات او حاجة. 

المهم ان المدونة دي حتعبر عن حاجات كتير بتدور في ذهني كمواطن مصري عايش في القرن الواحد وعشرين.  كزوج وأب وصديق..  شخص مش مميز. لا أدعي التميز أو اني احسن من غيري.. بس يمكن حد يقرا حاجة وتعمل أي فرق في حياته.

صباح الفل